NGÂIDAM RAWH ! || CHAPTER - 5

 

                                                                         CHAPTER - 5

Zân mut daŵn chuan ka chhiar hmabak chiah, Diary chu ka han keu leha, zêp miah lo chuan chhiar zawm leh chu ka phûr tawh lo, a chhan chu a aia chanchin chhe zawk hriat belh leh ka hlau a ni.

June Ni 25, 2018

Inhnuaiah tûk țhuan ei tûrin ka chhuk a, ka pain " Vid-a hei in Principal in tawhsual a tawk tlat mai, misual tû tih hriat lovin nizan lamah saw lai Factory ah sawn a sawisa hrep a ni awm a, ICU ah a awm mêk a nih chu,hei tûkin chanchinthar lamah a rawn puang chuai chuai mai " a ti a, ka phu zawk, ka mu tui lutukin khâng thil thleng zawng zawng kha kalo theihnghilh vek tawh, ka room-ah ka lêt leh nghal, țhutthlenga t-shirt thisen kai kha ka nuin a hmuh hma ngeia thuhrûk ka tum a ni. A lo awm ta rêng rêng lo mai, Msa ka call nghal chûk chûk, phone a la thei bawk silo, message a seen duh bawk silo, thin a va tirim țhin tak !

Tûkțhuan ei chhûng zawng ka pa lah chuan kan Principal chungchâng chu a sawi char chara, hrehawm ka va ti tak, ka rilruah tizaŵng hian ngaihtuahna a awm leh nghâl, ' ka nu hi ka thawh hmaiin ka room-ah a lo lût a nga, t-shirt kha hmuin a la a ni mai lo maw aw...' , a rûk hian min ringhlel reng mai a nga ka ti a, a ni lah chu a che zia leh a hmêlah engmah danglamna a awm silo, a pângngai vek si. Engpawh nise tual chu kan la that bik êm lo ve , " Lalpa ka lawm e " ka ti hiala a , ICU-ah tal a awm avang chuan, a nih leh lo țha chhuak leh vat ta se tih erawh ka ngaihtuah thui ngam lo.

School ka thlen veleh Msa ka zawng nghâl chûk chûk, hmuh tûr a la awm lo, sikul tlai chu a nunphung pangngai a nih avangin a rawn tlâi leh ngei dawn a ni tih ka hria, school țan hnu period 2 zawh thleng pawhin a lo la thleng lo. A ni bâkah Kimkimi pawhin school a rawn kallo bawk, eng nge maw an hriat ni hemi te pahnih hian' ka ti rilru a, Kimkimi chu a nu damloh vang a ni tih ka hre zui a, Msa erawh tuman a chhan kan hrelo.School pumpui lah chu Principal chanchin chuan a luah khat a, mi tam tak an râl khêl a, kalna lam apiangah a chanchin chu an lo sawi zêl mai si, hrehawm duh tak a ni.

Tlâi bânah chuan U Puipuia (Kan driver) chu Msa te ina min pên pui zuai tûrin ka ti a, an in lam pan chuan kan kal a. A ni chuan paŵnah minlo nghâk a, ka rei loh tûr thu ka hrilh. Door bell pawh hmet lêm lovin nidanga ka tih țhin ang thovin ka lût tlang pawp. Msa chu a pa hmaah dingin , a pa chu sofa-ah a lo țhu, an pafa chuan min lo en hû mai

" Vid-a hetah lo kal teh " tiin a pa chuan min ko vè nghal, kan thil tih kha a pa hian a hre chhuak a nih ngei daŵn hi ka ti rilru a, ka thin a phu dup dup

" Malsawmdawngkima hian damdawi ruih chi a ei țhin tih hi i hriatpui em ? " a ti ta, ka rin loh lam daih, chanchin țhalo tho chu ni mahse ka thaw a vêng huai mai.

" Hriatpui miah lo " tiin ka lu ka thing a

" A room-ah hei tiang damdawi hlauhawm lutuk hi a nuin a hmu chhuak a, ka ta a nilo tiin a la țang tlat leh nghal , vawiin pawh school kan rawn kaltir lo a nih kha, a inpuan hma chu helai bial chhûng hi a pêl daŵn lo hrim hrim " tiin a pa chu a thinrim hmêl hle a, sawi tûr a van vâng thei tak, ka țhianpa a nihna angin " Ka ta a nia, ka kawltîr a " tih mai chu ka châk, mahse buaina tho hmachhawn leh a ngai daŵna, awmzia a awm daŵnlo in ka hria, a nu eirawngbawl chu a rawn țawng hloh.

" Vid-a awmlai em em kha chuan hrethiam ve la pa, vid-a pawhin hrehawm a ti lutuk a nga sin " a rawn ti a

" Engti tûrin nge i rawn kal hrim hrima  ? " tiin a pa chuan min zaŵt leh, " Home work vêl hrilh ka tuma " ka ti nghal chat, chutia lei phawi lova daŵt ka sawi nghâl chat thei chu mak ka ti zàŵk hle.

" Dârkâr chanvê hun ka pe ang che u " tiin Msa nên chuan min thlah zalên a, a room-ah kan chho nghâl

" Eng nge call i lâk duh miah loh a ? ! " room kan luh rual rualin ka vîn nghal

" Mawla, â pain phone min chhuhsak daih tih hre ta che ! kha tia min hauh nghal chiam chiam " 

" A nih Principal chungchâng kha ilo hre vê em ?" ka ti a, " Aw Tv-ah ka hmu, a dam chhuah leh chuan kan tân a pawi khawp ang, khupa(ama pa) lellul khuan case a la daŵn leh nghal " a ti a, kan chan chu a chhe saŵt hle 

" Damdawi chu i lo rui țhin tak tak a mi a ?" Tiin ka zaŵt a " Ka sawi peihlo " a ti deuh hmak, " Aw " a tihnaah ka ngai, a hmaa a awmdân maksak deuh deuh, a chânga a thawveng thut te, a muthlu char char te, thill dang dang pawh a niang, a hmeh bel theih ang ang chu a hriat lêm lovin ka hmehbel ta pawp pawp

" Khawi home work chu " tiin min dîla, " Kan neilo " tiin ka chhâng

Min en hû pahin " A nih chuan eng ti tûrin nge ilo kal ? "

" T-shirt kha i haŵn a mi ?"

" Teuh lo mai, nga tan nge ka tih ang khatiang thisen kai hnuang ? ! "

Rilru a va hah leh ta ve, ka thaw haka, " Ka thawhin ka room-ah a awm tawh lo, țhutthlenga polythene chhûngah khan ka dah mai a, a nih chuan ka nu emaw, Puibawihin an la a ni ngei ang " ka ti a

" I dahna i hai a niang "

" Hai lo ka chiang lutuk "

" A nih chuan i nuin lo la ta se....? " , kan in en hu mai

 " Puibawihi chu a ni theilo school ka kal hma chu ka room-ah a lo lût ngailo " ka ti a

" Zawng țha leh phawt rawh i haihawt  sia i dahna i hai a niang , E taka, sir, damdawi khu ka ta ti mai teh a, Vid-an min kawltir ka tia nga " a rawn ti ta !, kut suihin min ngên, a va hahthlak tak

" A awih daŵn chuanglo, inpuang la ngaihdam dîl mai rawh " ka ti a

" A nih chuan daŵt sawi dân tûr eng emaw tal min ngaihtuah pui ve la, a nih loh chuan ka ngal a vaw tliak vek mai ang ! "

A nu a lo lûta, " Kha thingpui in ru le, Vid-a i lo lêng țha duhlo hlê mai i núte an dam maw ? " tiin min zaŵt a,

" Immm an dam țha e, nangni in dam țha zawk em ? "

Ka zawhna pawh min chhãng ta lovin, " I unaupa hi lo kaihruai deuh teh tiang chuan nun kawng diklo a zawh daŵn tlat mai, hei, tunah pawh a pa thin a tirima engtin nge an intih daŵn ni ? " rilru hah hmêl deuhin min hrilha, Msa lah chuan " Ka tâ a nilo ka tih mawlh mawlh kha nû, nang tal chuan awih ve la..." a lo ti , 

" Ka awih a laŵm ,  engpawh nise nun uluk taka tûn atanga in hman loh chuan nakinah nangmahni tán vek a nia, pawi in la ti dawn lutuk, " tiin min fuih leh hrâm a, " Vid-a zanriah ei ve nghál la i nu kan phone ang aw ?"  a ti a , " Aw ti rawh aw tirawh " Msa chuan a lo ti vat, a pa hauh tuar pui tu atan min duh tih ka chiang,

" Pawnah U Puipuian min nghâk a "

" Tu U Puipuia, e Driver fel deuh kha maw inla chhawr reng elaw ? "

" Aw "

" A polite sia a ni tê kha mi țha tak niin ka hria, a nih chaw chu i ei lovang maw ? " a ti nawn leh , " Immm, nidangah law law a nimai ka inring lo emai " tiin ka chhang a, Msa chu a lo laŵm lo nasa. A hnu rei loteah ka hawsan ta kha a ni a, a buaina pawh a inchingfel ve thei mai tûrah ka beisei. Thil pawi ta ber chu ka room chhûng kil tin uluk taka ka zawn pawhin T-shirt chu ka hmu ta hauh lo, ka chhungte chu an lo hmuh leh hmuh loh zawha, chu buaina chu chinfel vat ka châk, t-shirt narân mai a ni silo, tualthah tumna t-shirt a ni tlat si !

Ka nu chuan a la a nih ka ring ta bera, ka awm a ti nuamlo, a lakah ka inthlahrung veka, a miziaah danglamna a awm bawk silo, nidanga chanchhinthar ngaithla ngai manglo khân zanriah eikham vêleh ka pa bulah chuan țhuin chanchinthar chu ka ngaithla a, thuthar erawh a awm lo, zîng lama an puan bâk kha chu, ka nû chuan min enthla tlata hriatna ka nei zui leh nghal.

Zanreiah chuan tui taka ka mu chu țhang harhin, light a lo thim vêk, thli thaw chuan tukverh pardah-te chu chhêm thaw vûk vûkin, dawhkâna ka lehkha dah țhenkhat te pawh a lén darh chum chum mai, tukverh chu khâr tumin ka pan hnai, chutih lai chuan ka room kawngkhar chu zawi muangin a inhawng ri rêt rêt a, ka hawi phei vat, tûmah ka hmulo, kawngkhâr inhawng ri pawh chu a tawp ve hmak, ka room kawngka chu mut dawnah ka kalh hmak țhin si a, ka theihnghilh ngai lo, tukverh chu ka khâr lui a, thli thaw nasa tak pawh a rawn lût tawh lo, light a rawn de zawk zawk a, TV-a thlahrang film kan en țhin ang mai khan niin ka hria, light chu a èng tlang ta hloh, kawngka chu a lo inkhâr thiap, ka va pan hnai a, ka en zui ngat, kalh pawh a lo inkalh thlap, mak ka va ti tak , ka khum lama ka lêt leh lai tak chuan current chu a thim leh ta, kawngkhar pawh chu a ngai ang chiaha rawn inhawng ri leh rêt rêtin , ka hawi lêt ngam tawh lo, ka dinna ngaiah chuan ka ding renga, vawi leh khatah tu emawin ka hnung lam ațang chuan min rawn rêk bet tlat mai, min reh nãn chuan ka t-shirt vâr thisen kai hnuang kha a hmang a, thisen rim thang huam chu ka hre thei leh nghal, a hma zâna thil thleng ang mai khân, khâ pa khâ a lo kal niin ka hria, ka thaw thei tawhlo, ka thi daŵn tak ngial, ka khaw hmuh a vai ruai ruai a, " Lalpa min pui rawh " ka ti zo chiah chu mangchhia ata ka harh chhuak hlawl ! , ka lo thlan hluam a, ka va lawm tak êm , mahse chu hlauhna chuan ka tiril a fan tlat tawh, ka room chhung chu ka țîh deuh tlata, ka blanket lain inhnuai sitting room-ah ka zuk insawn ta ringawt.

A tûk zîng ka pain min hmu chu eng ti zia a sitting room-a riak mai nge ka nih min zawta, mangchhia ka neih thû te ka hrilh chuan " A pa loh thlâk emai a " tiin fiamthu deuhin min chhuah saka, ka khua a sik er er leh nghal, sikul pawh ka kal zawm lo, ka nu chuan chu thil thleng chu ka damlo taksa chakloh vângah a puh a. kan thil tih kha a hria ni tlatin ka hre thei , a chezia engkim dik mahse a mit ațangin ka hmu thei a ni.T-shirt chungchâng chu zawh mai ka duha, ka ngam thlawt silo, a hmuh thu lo sawi ta se eng nge chhuanlam ka siam tâk ang tiin ka ngaihtuah reuh reuh a. Chhûnah chuan ka room-ah damdawi min pe turin a lo kal a, ka insûm thei ta ngang lo,

" Nu, țhutthlenga t-shirt kha nangma lâk a ni em ? " ka ti ta pawp 

" Eng t-shirt nge Bawihte ka va hrelo ve ?" tiin min chhang, mahse dawt a sawi tih ka hria

" Nu i la tih ka hria a lawm " ka ti ve tlat , ka biangah ka mittui a far a, a ni chuan min rawn pan hnaiin, " In tih a nilo tiraw ? "  tiin min zawt ta !

" Keimahni kan ni, nu, ka tihpalh " tiin ka țapa , a ni chuan min rawn kuahin, " Mipa an țâp ngailo ka tih kha , aw ka lâk a lawm, ka lâk ngei a ni , ka paih bo tawh, tumahin an tihnat che ka phallo , an tina ngai lovang che, i kiangah ka awm reng dawn a lawm hlau mah ta che, i hria tiraw David? " tiin a ni pawh chu a țap a, ka nu chuan ka rin ang ngeiin engkim a lo hre vek tawh, kan pawi khawih dân pawh chu a kip a kawiin ka hrilh ta law law a, ka pa chu hrilh ve rih loh țhain a hria, kan nufa chuan kan zêp zui ta rih, Msa pawhin ka nu ka hrilh tih chu a la hre lêm lo.