ENDLESS LOOP || Movie Review 2025

Tunțum chu Leiverh tawp chin neilo (Tawp theilo) lamah tlân lût chhin daŵn ang aw ! , a hmasa in kan Movie review tur hi a thar a ni lêm lova, lo en tawh pawh in awm nual maithei. Scroll thla zêl la , a tawpah Full Movie en tur a awm....

STORY LINE : ENDLESS LOOP ' hi Chinese horror / thriller Movie, 2018 kuma tihchhuah tawh kha niin, Director 'He Wen ' leh script writer 'Xintao Shi' te kutchhuak a ni.

Passenger phur Bus pakhat chu khawkar kawng thui taka a tlan laiin chanchinthar duhawm lo tak maiin a rawn dênga, News puangtu chuan ' Kawng lakah accident a thlen avângin traffic jam nasa tak a thlen a, khualzin te chu kawng lakah hêlna (Shortcut) remchang mai an hmu a nih chuan hêl mai chu an tân a remchân zaŵk tur thu a rawn puang. Driver Qian' chuan kawng hêlna tur remchvng a lo hre hlauh, a passenger te chuan an duh chuan a kalpui theih thu a sawi, an ni ho chuan chutia khaw kâr kawnga tangkhan reng ai chuan tiin an lo duh nasa.

Hriat ngailoh lamtluang zawh chuan leiverh (Tunnel) chu an tlan lût ta, kawng lakah chuan passenger pakhat an tawng leh nawlh bawk, Driver chuan seat âwla țhu a, a chhuk daŵnah chuan man pe mai turin a hrilh, chutah passenger pakhat chuan a chanchinbu chhiar laia tualthattu, Police te zawn mêk nen chuan an hmel a inang deuh hian a lo hre nghal. Minute 20 chuang an tlân tawh hnuah pawh chuan leiverh(Tunnel) chu an la tlân chhuak theilo, driver lah chuan Bus chu a khalh chak mai si, a bula țhu Insuarance Agent ' hnathawk pakhat phei chuan passenger tân a hlauhawm lutuk tiin tlân muang deuh turin a lo hrilh ve chhên bawk. Driver lah chuan, chu kawng chu a vawikhat tlanna ve tho, midangin an hrilh atanga a hriat ve mai a nih thu a la sawi deuh deuh.

Chuti khawpa chaka an tlan chung pawhin an la chhuak thei lo, passenger te chuan an khawpui chhunga leiverh thui ber nia an sawi pawh, darkar chanve chhungin an tlanchhuak var var thei ni a sawiin, tuna mi, a aia tawi zawk hi engvanga chhuak mai theilo nge an nih tih an hrethiam thei ta lo.

An vai chuan an mangang tawh, tlân lêt leh mai turin an ti a, a țhenin driver chu hauvin, a ni lahin kawngchhiaa a tlânna zawng zawng leh a gas (Petrol) hman ral te nen chuan a inphu loh thu te a sawi a, chuanman te chu pêk belh hial tur an nih thu a lo sawi ve piap piap. Lungawilo takin Qian ' chuan Passenger te chu a han tlânlêt pui a, kal lama an tlân zât zet an tlan hnu pawhin anlo luh țanna hmun chu an thleng thei tawh rêng rêng lo.

Tumahin Leiverh tawpchin neilo (Endless Loop) an tihah chuan an tlan lût tih an hre silo, an inhnial buai luai luai a, chumi hnu chuan an zînga raipuar chu pawnah chhuakin, leiverha an tlanchhuah hma daiha a phone thlauh kha, chu leiverhah chhûngah chuan a va chhar ta hlawl, thil diklo a awm tih an hre thiam ta !, engtin tak awm zêl ang maw ?