ENGTIN NGE NGAIHZAWNG THEN VANGA RILRU NA (HEART BREAK) I TIH REH ANG ?

Mi vânnei, hmangaihtu dik tak tawng te tân chuan hmangaihna hi a mawi a, a hlu êm êm a ni. Chutih rualin hmangaihna zinkawnga vanduai bîk, phu rêng vang pawh ni lova tluang lo êm êm hi awm ve theih a ni. Mi țhenkhat chuan ințhenna (Breakup) a lo thlen hian an tuar nain, a la na êm êm a, an thinlung nâ a zia deuh nan tiin ruihlo-ah te, kawng diklo zawkah tum vâng ni miah silo vin an tlân ta țhin a ni.

Ngaih zawng țhen hlim emaw i nih chuan he thuziak hian i harsatna leh i phurrit te lo chhawk ngei se, i la țhen ve chiah lo a nih pawhin i vannei hle tih hria la, chtih rualin hmalam hun tuman kan hre lo, hêng a hnuaia point hrang hrang te hi a țul thuta hman țangkai atan ilo chhin chhiah ve dawn nia.

1. PAWM THIAM RAWH : Thil thleng tawh chu pawm tawp rawh, hun kal tawh te ngaihtuah lêtin intih nat tir reng lo la, " Eng nge tih dik loh ka neih bik ' tiin ngaihtuah nawn fo suh, i ta tur a ni lova, a ta tur i ni bik lo bawka, khuanu samsuih ' in nilo tih pawm hmiah rawh.

2.THIL HLUI TE DAH BO RAWH : Amah hriat chhuah tir thei tu che thil entir nân, birthday gift, thlalak, message etc te chu dahbo vek rih rawh. Tuna tân chuan a tawk rih, hun a inherliam a nga, i thinlung hliam te a zia hunah ila phawrh chhuak leh zawk dawn nia.

3.ÛM ZUI SUH : Ûmzui ngai suh, i hmangaih zia a la hre chhuak dawn chauh, ngaihdam pawh a la rawn dil zawk maithei che, emaw, a rukin inchhîr takin a awm fo vang. Midang lakah a rinawm lohsan che emaw, inthen a duh hrim hrim vanga a kalsan che a nih chuan va call luih hram hram te, message va thawn vak vak te khan i zahawmna a ti nep a, a rukin a lo chapo phah viau mai ang. A social media-a a hun hman dan, a hlim em , tu bulah nge hun a hman , eng nge a status tih vel kha intihbuai tir lo la, ensak lo ngam rawh.

Țap la, mal ngawih ngawih a i awm a nih pawhin mite pawhin an lo tuar ve tawh a ni tih pawm tawp rawh, i tuar chhuak thei  dawn lutuk.

4.INSAWI THAWL I MAMAWH : Mahni a taŵt up upa awm kha  a țha lo, insawi thaŵlna i mamawh, i țhian țha tu emaw hnenah inbun ruah tum la, i chhungte i unau tu emaw, i nu leh pa pawh, i harsatna te chu an chingfel thei dawn lo, mahse i insawi thaŵl khan i zâng hawk dawn. 

Han sawi maina tûr remchang emaw, mi rin deuh tak i nei lemlo a ni pawhin, lehkhabuah emaw, Diary-ah i rilru hahna te, i natna te chu i rilru a a awm ang angin ziak chhuak țhin rawh.

5.INLAICHINNA DANGAH ZUANG LÛT RIH SUH : I rilru na leh khawhar a zia nân ngaihzawng dang neih kha a finthlak ber lo mai thei, i thinlung hliam kha dam fel tir phawt rawh. A nih loh chuan i ngaihzawng thar lakah beiseina i nei sâng a nga, i ex' a hriat chhuah nawn tir fo che bakah, amah aia alo fello deuh a, i beisei a phak loh phei chuan i na tawlh tawlh dawn.

6.MAHNI INHMANGAIH : Mahni inhmangaih ' tih hi mi tam tak chuan țawngkam hmasial deuhah an ngai țhin, mahse a ni lo, mahni inhmangaih nachang hrelo chuan midang pawh an hmangaih tak tak theilo an ti.

Engpawh ni se mahni i inhmangaih a, i in enkawl dam loh chuan tuman an rawn tihsak thei lo che. Mu tam la, ei leh in țha ei la, exercise lak te pawh a harsa deuh a nih pawhin rei lo te te tih tum rawh, Inchhunga thil ngaihtuah ngut nguta tawm reng ai chuan pawnah te tei chhuak la, thui lo tê tê kal rawh.

7.TIH TÛR ZAWNG RAWH : Awm mai mai kha i tan țhil țhalo tak ani tih hria la, i hmelma lian takah ngai tawp rawh !. Tih tûr zawng la, inchhungah hna i thawk ve ngai vaklo a nih pawhin i chhungte zawt la, eng tin nge i puih theih ang, i taksa che tam se, i rilru la pengtu thil tih tûr zawng hram hram rawh.

8.HOBBY THAR NEIH TUM RAWH : Tûn hmaa ilo tih țhin i chhunzawm tâk loh emaw, tih ngaih vakloh i tih chak si kha ti pawp rawh. Entirnan, lehkhabu ziah, short story ang mai mai te, poem emaw hla phuah te, DIY eng eng emaw te, hmasawna a nih bakah i rilru nasa takin a êng lamah a hruai thei dawn a ni.

9.ȚHIAN KAWM FIMKHUR  :  Nangmah hmangaihtu tak tak, țhian țha ni a i hriat te bulah awm tam  la, amah hriat chhuah tir duh tlat tu che, a chanchin sawi fo țhin te kha hlat ngam rawh.

10. A ENG ZAWNGIN THIL THLIR RAWH : Hêng natna kan tawrh zawng zawng hi mihring kan nih chhunga lo thleng tur rêng a ni tih hriain, i dinhmun engkimah lungawi zir la, hmalam pan turin a êng zawngin thlir hrâm hrâm ang che. Mahni infuih phûr thiamlo chi i nih chuan instagram, facebook, youtube etc velah fuihna(Motivational) tam tak, mi thiam leh ril tak tak siam a awm a, en nachang hria la i hmang țangkai dawn nia.

Hêng bakah hian sakhaw mi tak  ilo ni țhin a nih phei chuan Pathian lam hnaihna hun remchangah hmang la, țawngțai tam phah la, i phurrit te Pathianin a chhawk thei tih i hre reng dawn nia.