NGÂIDAM RAWH ! || CHAPTER

CHAPTER - 4

" Lê... sawi zawm rawh le ? "

Sawi zawm tura min tih chu hre reng thovin " Eng chu...? "

" Aw... thawnthû khâ "

A theihnghilh vek tawh ka rin nen nen, bakah, vawiin chu hmânni ang khân ka phur tawh lo, nizan lawka ka diary chhiar khan ka mood zawng zawng a la tichhe vek, hlim hmel erawh put hrâm hrâm ka tum, mite hian engmah min hriatpui dêr silo, nuih hi chu a awlsama, hlim tak hi a lo har a ni.

Ka malchungah chuan Duhsaka chu thlamuang deuhin a mû a, kan piah lawk lawkah chuan inngaizawng dangte pawh an awm ve nual, helai hmun hi chu a romantic ve êm a ni, kan In ațanga hmun hnai deuh kal mai theih ni phei sela chu tlai tin mahni pawhin ka kal ziah peih ka ring. Tlai ni tla tur lah hi a mawi thei êm êm a, ngaih em em tur neilo tan pawh lunglên veng vengna tham a ni.

" I sawi daŵn lo maw ? " a rawn ti thûm bûl a,

Naupang thil ngên ang maiin ngen tak têin a ngên tawh, ka sawi zawm leh mai loh chuan.

" Kan class mipaah chuan David-a chu a luck bera, kan class mai a nilo, kan school pumpui hmeichhia te star rawn a ni, a bialnu ka ni thei pawh chu ka inchhuang hle, mahse chapo lam ni lo se ngaizawngtu kei pawhin ka nei nual, kan inngaihzawng tih an hre reng chung pawhin mi pa 3 laiin min bêm a, an zinga pakhat, Duhawma phei chu beidawng țhak duhlo ang chi kha. A theih ang angin min zar buai ve a, kan Class CR a ni bawk nen biak țhat loh ngam siloh, David-a hrilh phei ila chu a châklo viau maithei a ni. A hrechianglo tan chuan David-a lah hi nêl sual hlauhawm, a paẃn lam lan dânah chuan rawlthar nunnêm leh nungchang țha, mahni inngaitlawm tak, midangte zahder thiam em em a ni a, a sual ka tihna lam ni lovin, a tihloh chinah hi chuan hlauh leh zah vak a nei lêm tawh lo țhin, chulam hawi zawk chu a ni, fapa mal khalh kha a ni ve hrim hrima a awm ve viau.

A hauh hian min hauh bur a ni tawp, a thîkthu pawh a chhia, mipa dâng ka be țha deuha a hriat chuan inhauhna hi a thleng deuh reng mai a ni.

Kan mizia hi zêplo chuan a inang viau lawi a, kei pawh tihloh lam chu tilo bur, daŵt sawi ngai thei miah lo, thudik sawia hremna tuar a ngaih pawha tuar huam țhin zawk ka ni. Mihring aia upa zah derna nei miahlo hi ka haw êm êm bawk.

" Malsawmdawngkim ! " tiin kan zirtirtu chuan a thil chhiar laklawh lai chuan a rawn au tuar, dawhkân bawhin a la muthlu," David kaitho teh ! ", David-a chuan a han sawi deuh nawk nawk, a rawn zi țial țial,

" Ding teh ! "

Mit nuai nawk nawk pahin a ding a, " Engvangun nge i lo mutthlûk ? " tiin a han vîn deuh tuar

" Ka mutthlu lo ! " a ti veleh hmak, a confi mai siah

" Ka muthlu lo a ? !! "

" Aw ka țawngțai a lawm "

Kan zavai chuan kan nui tawp, a muthlu tih lah chu a sam thur leh a hmêl ațang zawng zawng chuan a chiang mai si.

" Hetah rawn kal teh "

Kan zirtirtu bulah chuan a va kal hnai a, " I kut dawh rawh "

" Min vaw dawn a mi ? " tiin a zawt hû

Kan zavai chuan kan lo nui leh tawp,

" Aw vaw dawn ! " vîn deuhin

" A... sir, ka țhingțhi duh zaŵk "

Kan sir' a ngam lutuk chu kan lo nui leh tawp, Sir Thanga a ni a, zirlai tu pawhin kan ngaina rêng a ni, a vîn pauh leh a ngainat awm zawk tih tûr hi a nia, tlangvâl senior mi inchengvawng lutuk niin, a haihawt lutuk vâng erawh hi chuan nuih zatthlak tak taka chêt chang a nei. Msa pawh chu minute 5 vêl a țhingțhit tîra, a kal tîr leh mai.

Short Break-ah chuan ka nau Jeremy-a tiffin box ka ah tlang sak daih avangin an class room lam panin ka va kala, pawl hniam lam ho nên kan awmna building a inhlat deuh avangin kan in kal pawh ngai vak lêmlo.

Ka lêt leh chuan kan class room-ah chuan an lo phusa luai luai a, hmeichhe țhenkhat an au tuar tuar, insual an awm tih ka hrethiam mai, a țhen insual țhelh tum, a țhen insual tîr loh hlau lo phusa, tute ber nge insual pawh ka la hmu theilo, kan class-a mi te chauh pawh an nilo, class danga mite pawh an awm nual.

Nakinah chuan David-an tû emaw a bawh beta a hnek chawrh chawrh hi ka hmu a, ka tlân pheia ka va man bet " David duhtàẃk rawh " tiin ka au tuar, a kut chu ka man beh sak a, a sawi sak chu kan Class CR ka sawi zuai Duhawma ngei kha a lo ni a, zirtirtute rawn thleng khaŵm nghâlin kan pathum chuan Office-ah koh luh kan ni .

Min va han tizak tak, zirtirtu te chuan an ni pahnih chu zawhna an zawt zêl a, Duhawma chuan David-a chu keimah minlo ngaizawng ve tawhlo tûrin a lo ti a ni awm a, an thinrim inhnial buai chu an insual zui ta a ni, chutiang thil vêl an sawi lai chuan ka lo kim ki chawih chawi a. Keimah vânga insual ni mahse ka thiamloh engmah a awm ve loh avangin chu buainaah chuan ka fihlim a, an ni pahnih erawh hrem nân kâr 1 chhûng sikul kal lo tûra tih(Suspended) an ni , zirtirtu ten an la inchibai tîr zui, an in melh no lo teh e !

A tûk ațang chuan David-a chu school a rawn kal thei ta lo va, khawharthlak ka va han ti ngawih ngawih tak, school te chu chawlh ve mai ka duh rum rum, mal ngawih ngawih hian ka inhria a ni. Zan tin phone ațangin kan inbia a, a aw ringawt hriat chu a tawklo, a awm nghênga bei leh vawng vawng ka châk, a perfume chocolate rim nam châk te kha ka va han hre leh châk tawh tak. Kan Class-ah chuan țhian dang ka nei vak lo, a chhan chu hmeichhe dang ho chuan min thîk vang a ni, tumahin min kawm țha duh lova, kawm enah pawh ka en bik lo, pawi ka ti lêm lo, Msa a awm hloh va, a ni lah hi țhian hrang hrang close tak tak siloh hian a nei zul a, kan sikulah chuan a tê ber ațanga a lian ber thlengin a hming hrelo pawh hi an awm lo.

Nikhat chu Ms-an David-a a damloh thu min hrilh a, school bânah chuan kan inah pawh haw lovin an in lam panin ka tlang nghal a, ka nau Jeremy-a chu Ms-an an ruala a haw theih thu a sawi avangin ka ngaihtuah lêm lo. David-a te In chu ka vawikhat kalna tûr a ni leh nghâl, ka zâm takzet. Door bell chu ka han hmet ri tleng , nula pakhat hian kawngkhâr chu min lo hawn a ,

" David-a te in a ni em aw ? " tiin ka zaŵt a

" Aw ni e Kimkimi a mi i nih ? "

" Imm "

" Lo lût rawh ", ka zui lût a, an inchhûng chu a zau vin, an bungrua( furniture) engkim chu man to tak tak vek a ni tih ka hre thei nghal, chu mai a ni lo , kil tin mai chû a fai tle sar mai hian ka hria, mi ina ka lên chuan an inchhûng a fâi țha em tih hi ka en hmasak ber țhin a ni bawk, he In zêt zawng a bû ang thlap ' an tih ang mai kha a ni. Inchungah chuan min hruai chho va, bang chu lemziak nalh tak tak a intâr fur a, ennawm a va tling , mawl hmêl deuha hawi hu hu erawh ka duh bîk țhak lo, mahni inring taŵk takin awm ka tum hrâm hrâm a. David-a room kawngkhâr chu a kik a, a lo hawng nghâl,

" I damlo tak tak a mi ? " tiin ka be vata

" Damlo hmêl ka pu em ? " nui sângin min zaŵt let

" Ka hre lo, Ms-an a damlo serious lutuk a ti che a " tiin ka hrilh leh, a nui ringawt

" Hey, I damlo tak tak lo a mi ?" tiin ka zawt leh, thla 1 dawn inpawh taka kan inngai zawng tawh chungin, vawiin chu kan ingaihzawn tirh ang mai khan ka lâi tlat, kan inhmuh khât vang nge, a hmel pawh ka la en țha ngamlo, nidang zawng aiin a lang țha a, a êng sar ni ber hian ka hria.

" Ka damlo a lawm " tiin ka kut chu min vawn sak a,

A pang deh pahin," I eng nge na a ? "

Inla zei deuhin " Ka thinlung !" ka kut a chal ka dawmna chu a lung zawnah zawk min sawn thlak sak a, " Ka hmu khât lutuk che a ka thinlung a na " a ti a, kan pahnih chuan kan in nuih seih. Ka ngâi takzet a ni kei pawhin, a biangah chuan ka piai a, ka thlah phal tawh lo, " Ka van ngai tak che " ka ti ringawt

" Nang aiin ka ngai zawk ang che "

"Nang aiin " ka ti ve leh, " Nang aiin " a ti leh hrâm , " Inhnial lo vang ka peihlo a nia " ka ti sep a, ka hmuiah min rawn kiss a, ka feel țan dawn chauh tihin nula khan kawngkhar a lo kik !, a va laklawh tak, a va kala, thingpui rawn chawi lûtin room kawngkhar chu a kalh zui hmak,

" Khawnge i chhûngtê "ka ti a

" An zin a kolkata-ah, naktûk tûk lehah an lo haw ang "

Dîl chhût deuhvin " Damlo an awm a mi ?" tiin ka zawh zawm nghal

"Aih , awmlo ka pa hna thilah "

A inbual zo deuh chiah a niang a sam la huh chhap chu towel chuan a hru thuak thuak a, kawr a hak loh avang chuan tlêmin ka tîm deuh, a pumrua erawh chêr silo, thau silo, mipa pumrua a nalh ka tih chi tak a ni, naute duhawm deuh nen hian ka tehkhin

" Thingpui kha in rawh " min ti a, thingpui lah chu no khat chiah a awm ,

" Khawnge i ta ve tûr ?" Ka ti a

" Inah thingpui ka in ngai lo " tiin min chhang

" A tui phian hi... " tiin ka han lem leh khalh

A vawi hnih nân min rawn kiss leh a, kan kut leh kut chu nghet takin kan invuana, khatih lai khân thlah tawhlo tura vawn reng theih ka châk, chulai tak chuan khawvêl pawh taŵp mahse pawi ka ti lo vang.Tum loh dêuhvin s*x kan hmang ve ta ringawt !.

kan vawi 1-na ve ve a ni a, tihpalh thil thu tak tak a ni, tiang lam hi vawikhat mah kalo ngaihtuah ngailo hrim hrima kei phei chuan. zahthlak ka ti hnuhnawh hle. Kha thil thleng khan a hma aiin kan inpawhna pawh kha a ti tlêm ta vek zawk ni mai hian ka hria, a hnu ah chuan sawi pawh kan sawi zui ngai tawh lo, han tih nawn leh chhin chakna pawh kan nei zui lêm lo. Kan inhmangaihna erawh a zual sauh sauh a, school a rawn kal leh hma loh chu an in-ah chuan ka kal zui tawh lo thung.

Ka inthiamlo chuan " I rilru a na em ? " tiin Duhsaka chu ka zaŵt a,

" Na țep, mahse hun kal tawh a nia, engtikah mah min tina nawn leh tûrin a rawn lêt tawh dawn hlêi nem, bâkah i thiamloh engmah a awm lo " a ti a,

Hepa ka ngainat em em chhan hi a nia, thudik tak, sawi tùr dik tak chuah hi a kâ ațang hian a chhuak țhin.