NGÂIDAM RAWH ! || CHAPTER - 3

                                                                         CHAPTER - 3

A pâ damloh vângin Duhsaka chu a rawn lêng leh thei ta si lova, keimahin kan assignment te chu ka ti mawp mawp, ka zo chiah chu ka lukham hnuaia ka thil dah, David-a  " Diary ' ngei mai chu ka ban nghal chat.

Chhiar pawh chhiar lovin ka han keu thuak thuak phawt a, ka keu pelh tawh hnu phêk pakhat, pen tui lehkha phêka kai deuh nuai chuan ka rilru a la tlat, ka han keu let leh thuak thuak a, ka hmu ta mai lo, a bul ațang chuan ka keu nawn leh, phêk khat tê tê a keu chuan zân a tlai leh hman vek dawn si, ka rilru a hah hman hlê.

Vawi 4 vêl ka keu kual thuak thuak hnuah ka hmu chhuak leh hlawl, hemi nî ngei hi ka thil hriat châk inziahna chu a ni, 

June ni 24, 2018

He mangchhia ang maia ka nun buai nuai ațang hian harhchhuak thei tawh ila ka va ti êm, 

Lunch  break-ah chuan Kimkimi ka hmu miah lova, tuman a awmna an hre bawk si lo, kan zirtirtu ten a țhî(necklace) an man saka, school kal daŵnah a phelh theihnghilh a ni aŵm a, ngaihdam a dil pawn principal kutah an hlan sak lui hrâm a, a mita mittui tling puau te khan min tina takzet, kha thil thleng vâng khân a rilru a nâ a nga, inchung lamah boruak thawveng hip tumin a chho a nih ka ring, ka chho ve nghâl.

Kan school hi chhâwng 5 lai a sâng niin, chhâwng 5-na tak hi an la sak zawh loh avângin luh tlang pawh an phal lêm lo, luh tlang luih chu pawisa chawi (fine) theihna a nih avângin zirlai dang lut lui ngam pawh an tam lo, kan țhian zaho tih loh chu.

Ka rin ang ngeiin Kimkimi chu a lo awm, a sam chu thliin a chhêm lêng delh delh a, a hmel pawh hmu thei lo mah ila a hnung lam ațang ringawt pawh chuan a hlimlo tih ka hre thei nghal.

ka aw ka han thian kharh a, minlo en , a bulah chuan ka țhu ve nghal a,

A dârah chuan kuahin, " Ka zawng char char che asin, tinge i va hlim loh hmel ve ? " tiin ka zâwt a, ka dâra bei hnâp chuan a țap zui ta, 

" Pawi ti mah ta che i țhî chu ka lâk kir sak leh em em ang che, min ring rawh " ka ti a,

A țhî, a kut phaha a hûmna chu tikauvin, zawi muangin a rawn pharh a, țhî ber an pe lêt tawh a nih si chuan, tinge a la țah aw...., ' a rilru a la nâ a nih dawn hi ' ka ti rilru a, 

"  Pe lêt lo che pawh nise ka ru chhuak tho tho vang ka lo ti asin " ka ti a.

a ni chuan " Min pe let hlei nêm " tiin

Mak ti deuh hian amah chu ka en nghal, " Țhi hi i lâk lêt duh chuan ihhh, ihhh, Principal khân"

A sawi zawm mai thei lo

" Engtin nge a tih ! "

" Ihhh i kawr phelh rawh min tia " 

A țap zui nghâl, ka hrethiam ta chiah, ka thin a va rim tehreng em ? Chu mihring tenawm tak chu ka theihtawp a nasa a sawi sak ka châk, ka thinrimna chu a sosang hle mai, kal nghal ka tuma, Kimkimi chuan min kuah nghet sauh.

"Aih kal suh, khawngaih takin mualpho ka duh lo " tiin mi ngên a

Vîn deuh hian " I mualpho dawn hlei nem, mualpho tur chu amah zawk a lawm ! " tiin ka chhang a

Kimkimi berin insûm tura min tih avâng chuan ka inbeng dâi thei hrâm, Kimkimi khân tuma hnenah sawi lo turin min ti nain, Msa bulah chu thil thleng chu ka hrilh veleh, ka unaupa ang hiala ka en, ka mimal leh chhungkaw buaina, thurûk engkim ka sawipui ngam a nih avangin ka hrilh lo theilo.

Kei ai aiin a lo thinrim, tlai sikul bânah chuan Garage-ah(Car dahna) kan lût ru a, a car ke kan hawlh  thêp sak vek, chumai pawh chu duhtaŵk lovin, hremna dang pêk belh ngei kan tuma, ruahmanna kan siam ta a ni.

Ruahmanna țhalo tak, ka pian tirh ata thutlûkna ka siam tawha la pawi ber, ka nun zawng zawng tichhe vektu chu !

Msa nen chuan vawikhat bazâra kan kal țumin, drug addict hian a phone hman lai kan duh lo chung min lei luih tira, tihngaihna pawh kan hre zuilo, kan dahțha tawp, hman țangkai dân tûr kan hre ta, chumi phone hmang chuan Principal chu Message kan thawn a, Kimkimi angin, Factory pakhat, a nei tuten an roh san vek tawh, mi pawhin an tlawh pawh zen zen lohnaah chuan lo kal tûrin kan ti a, kan tum dân chuan sawisak hrep a, kal bosan a ni.

Kei leh Msa ruahmanna a ni a, Kimkimi pawh kan hrilh lo. Principal chu a lo phûr nasa mai, dâr zat te min rawn zaŵt nghal chûk chûk, engmah ngaih țhatlohna a nei lêmlo . 

Zânah chuan Msa chu kan ruahman lawk angin kan Inah, a nu scooty in a rawn kal a, lehkha zir dûn tûr angin kan insawi a ni. ka chhûngte bulah Ms-an lehkhabu pawimawh deuh a theihnghilh vângin an inah kan kal a ngaih thu kan sawi leh a, Factory lam chu kan pan ta !

Chulai hmun chu duhthusama pawi khawih nana țha a ni, a thim êm êm a, a piah kawngpuia steet light êng pakhat lo chu light inchhi dang a awmlo,  thla erawh a êng narawh, hnim hring te pawh a hmuh theih vek hial.

A rawn thlen hma chuan kan awmhmun tur kanlo khuar a, Msa hi a pa, tiang pawi khawihna lam hnu chhui thiam, Detective a nih vângin a fing êm êm a, tûn țumah pawh hian engmah hnu hma nei lova chêt kan tum a ni,

Kawngpui ațang chuan kan awmna lam panin motor pakhat a rawn tlân peng ta, 

Msa chuan " Amah a ni em ? " a rawn ti a, ka lo bu nghauh

Phun ser serin " Midang chuang ve an awm em ? "  tiin min zaŵt leh, ka enhlatna (binocular) chuan uluk leh zualin ka en a, 

"Awmlo , amah chauh ka hmu, seat hnung pawh a aŵl "

" Confirm ? "

"Aw confirm "

Hrilh hranpa pawh ngai lêm lovin a car chu kawngpuia vei vâkten an hmuh mai loh nan a biru thei ang berah a park nghal chat, kawngkhâr chu rawn hawngin a rawn pen chhuak ta țhêm țhêm. A han hawi kual vêl, tumah a hmu silo, barrel phên ațang chuan uluk takin kalo thli thlaia, Msa-an chhuak ve rihlo tura min tih vâng a ni, engtin nge chêt lak a tum pawh ka hre rihlo, Principal tenawma chuan a phone chu hmet leh tê têin, ka phone-ah chuan " Ka lo thleng " tih message a lo lut zûi, a rawn call zui nghâl , silent ah kalo dah hlauh, ka va vannei tak, fing pawh ka inti ru viau, " ka lo thleng țep " tiin a message chu ka chhâng lêt a

" Ok " tih rawn thawn lehin, Car-a luh leh a tum lai tak chuan a hnunzângah Msa chuan a rawn vaw chawrh, a let nghal tawp, ka tlan phei ve nghal a.

Inchhungah kan hnûk lûta, chair-ah chuan nghet taka phuar hlawmin kan țhut tira.

" Tute nge in nih ? !!! " 

Tute nge kan nih tih chu hrilh ka châk hle mai, kan hmai tuamna chu hliha han inhmuh tîr sak ka duha, a rem silo, ka thinrimna zawng zawng chu hrîkthlak nghal vek ka duh a ni. A hmaiah chuan ka theih tawpa nain ka hnek pawp pawp a,  Kimkimi laka tenawm taka chêt a tum lai tûr hmel ka mitthla phei chuan thing tuma khawn thlûk ve nghal tawp mai ka châk, tiang em ema thinrimna sosâng hi ka la nei ngailo.

Msa chuan taŵp rih turin min ti a, a hnâr leh kâ chu thisenin a bual hneh hle tawh, țhut pawh a thu ngil thei tawh meuh lo, a chau viau emaw kan tih laiin amah kan phuarna hrui chu engtin tin emaw a lo phelha, a tlân ta thut, kawngpui lamah nilo, ramngaw lamah  a tlân avâng chuan bihrûkna mai tûr a tam angreng si a, zân thimah hian ka mit a țhat vak loh avangin thil ka hmu chiang theilo leh nghal, kan misuala chu a bo zui chu a ni ta dêr mai, thingkung phên velah chuan a biru a nih kan ringa, kan pahnih dinhmun chu a derthawng ta zawk tlat.

Khawi lai kil ațang emawin min rawn bei lêt thut thei reng a ni, tu zawk nge dinhmun țha pawh ka hre tawh lo, Msa chuan ințhen hrang ang ' a ti a, a kal liam chiah tiah chuan ka hnung lam ațangin min rawn bawh bet thut,  rawlthar kum 17 mi lek tân chuan patling hrisel leh chak, tlâi tin gym a kal țhin han beih let chu har ve tak a ni, a tîr lamah lo sawisa sil tawhlo ngat phei ila chu minva ching let hneh dawn êm, ka hrawkah chuan min rêk a, min reh hlum mai chu a pawi tilo tih ka hria, ka hmai tuamna chu a phih thla a, ka hmel a hmu chu " Lalremruat ! " tiin min thlah, 

"Nang hi, engtin nge a nih theih ! "

A tukkhumah Msa chuan thingtumin a rawn vaw leh chawrh , a let nghal tawp mai asin, inchiu laia thisen hmuh pawh ngamlo țhin tân chuan a thisen chhuak nasa lutuk chu râpawm duh tak a ni, a rim vang te chuan ka uak nghal tuar tuar, Msa chu thawk tha inti takin leiah chuan a let ve nghal dêr, 

" Mission Complete " tiin a phun sep

Kei chuan Principal chu ka va bêl chianga, a thî ni ngeiin ka hria, a mit a meng kura a khap eihlo, hlauthawng deuhin a lungphu ka dek leh, a phu eih lo bawk

" A , thî....in, ka, hria " ka ti ban chaih, Msa chu rawn tho țual țualin, a lungphu chu a rawn dek ve nghâl, 

" Aw a thaw tawh lo, a thî " tiin a nui ta vak vak a, a â ta emaw ni, a awmdan chuan min ti hlau zawk mah 

" Tinge i nuih chiama i â mi ?, tual thah chu a hlimawm viau a mi? !!, tinge khatiang em ema nain i rawn vuak ? " tiin ka vîn ta hrep 

" Mawla a pawi lo zawk, i hmêl engkim a hmu vek, a dam chhuak a nih chuan kan pahnih tan a pawi daŵn lutuk " min zilh lêt veleh hrep

Sawi ve tûr pawh ka hre tawhlo, milim ang mai hian ruang chu enin, chu thla eng hnuaiah chuan ka ding khawng reng mai a ni.

" David ! Kal a hun" tiin min rawn au leh tuar a, ka che sawn thei tawh lo, Msa chuan min rawn pawt a

Ngawi rengin ka zui, kan awmna ațanga hla deuh takah scooty kan dah avângin kawng chu a mumal lo nen, thui ka ti hle, vawt tihna hian min man tlat leh nghal, ka khur der der mai.

" Kawng tluanin engmah kan sawi lo, inbe miah lovin kan tlân char char a, a reh hian a reh tlawk tlawk "

In kan thlen daŵnah chuan ka phone a lo ri a,

" Aw Hello nu  "

"In va rei ve bawiha Minute 15 lek in ti sia hei zân a rei mai dawn, Malsawma pawh a riak nghal dawn te a nih loh chuan a va buaithlak awm ve "

" I lo riak dawn em ? " phurlo deuh hian ka zaŵt a,

" Aw dawn e "

" Aw a lo riak nghal dawn kan lo thleng a ni mai "

" Aw le fimkhur ula "

Ka thuamhnaw a thisen kai hnuang leh, bâl kai hrup te chu tih ngaihna ka hre lo, ka nu leh paten inchhung kan luh rualin anlo hmu nghal chat dawn si, Msa bawk chuan ruahmanna a nei leh. Kawrlum a lo hak thuah hloh va, thisen leh bâl a kai ve vak lêm loh avangin, ka kawr chu hlipin bag-ah kan dah luta, a kawrlum zawk chu ka hâk sak a.

In kan luh chuan ka nûte chuan Tv an lo en tui hlauh, min rawn belchiang lêm lo, kan rei an tih thu te chu sawiin, chhuanlam fahrah te te kan siam a ka room-ah kan lût chho nghal.

Thisen rim chu ka hnârah la châm tlatin, bathroom-ah ka luak nghal bawrh bawrh, Msa chuan ka hnung a rawn zût nawk nawk, 

" Tui in tur ka zuk la ang "

" In enfiah hmasa rawh thisen te i kai a nge aw ? " ka ti a

" Kei chu ka fai vek " tiin a hmai chu a phih nawk nawk a, ka sana ka kutah a awm lo , keimah bawk chu ka buai leh ta,

" Ka sana ! "

" Tinge ? "

" Ka sana ka thlauh ! "

A kawr ipte ațang chuan ka sana chu phawrhin, " Detective an chesual ve mai mai ngailo " tiin min pe a, ka thaw huai mai...

Ka t-shirt zaŵk thisen kai hnuang chu bucket-ah chuan chiahin, sûk nghal ka tum chuk chuk a, ka nuin ka room kawngkhar a rawn chum ri dawt dawt,

Msa hnenah , " Va hawn rawh, a inthiar ti mai rawh " ka ti a,

Kawngka a hawng chiah ka nuin, " Mei zu ru in awm leh tawh a mawni chu aw.... room kawngkhar hi in kalh ziah mai a ! " a ti ri te chu ka hria a,

" In tv en ri khân kan rilru a la pênga chuvang zawk "

Dawt sawi hi chu a thiam țhin khawp mai,

" Khawnge David-a pawh chu a awm a ? ! "

" A e "

Deuh tawp a, sawi mawina dang a awm ngang lo a maw ni. Thisen thang rim chu ka ti theilo, ka uak leh dawn zêl, ka nu room-ah a la awm bawk si , a va hrehawm tak .

T-shirt vâr a nih avângin a reh theilo, a rûka paih mai turin kan pack a, ka khua lah chu a sik er er, nachhawkna chu ka ei vat a, zân dâr 11 lai a lo ri tawh , Msa lah chuan haw a duh thu a sawi leh tlat peka, ka pâ remti lo chung a haw lui tho.

Ka mitthlaah chuan kan pawi khawihna hmun leh hma, chiang takin a rawn lang nawn sek, thil dang rêng rêng ka ngaihtuah thei tawh lo, hlauhna leh mangana nasa takin min man a, ka thlan a so bulh bulh, ni danga ka harsatna tawh chu nise ka nû leh pâ, min hmangaih êm êm tute chu ka hrilh a nga, an nin engtin emaw talin chinfel dân min zawn pui mai tûr. Ka tân hrilh a rem silo, hrehawm ka va ti tak êm, Pathian hnenah chuan min ngaihdam duh pawh ring chuang lovin " Lalpa min ngaidam hrâm rawh aw ? " ka ti mawlh mawlh mai.

NEXT CHAPTER : CHAPTER - 4