NGÂIDAM RAWH ! || CHAPTER

CHAPTER - 2

" U kimkim ! "

A aia ringin " U Kimkim ! , a thi a mi le ? "

Ka nau Jeremy-an min rawn auh chu ka hre deuh ruai ruai

" Uuuu, i damlo a mi ? "

Ka harh pângngai ve chiah, zân lama ka diary chhiar kha ka suangtuahna kal thui lutuk kalo muthilh hnan daih chu niin, Nî lah chu a lo êng uar tawh,

" Dâr engzat nge " tiin ka zawt a

" Dâr 8 a ri dawn kan tlai ange aw, a nû pawh a kal daih tawh a nia, chaw ei kalo siam ang " tiin min chhuahsan a, ka taksa chu sawisak hrep ang mai hian a sil țhûm a, ka lu lah chu a rih belh ni mai hian ka hria.

College kal tûrin ka insiam nghal mawp mawp a, tlai ka hlau lutuk chuan ka phone lo ri ve chhên pawh chu ka chhâng hman lo, tûkțhuan kan ei a, ka nau chu school thleng ka va thlah hnuah Duhsakan min rawn lam ve leh.

Vân te chu a thiangin nidang zawng aiin a mawi êm êm a, ka sawithiam dân ber chuan kan chênna khawvel chu sûk fai hlim ang maiin a fâi sar mai, nimin lama ruah nasa tak sûr khân engkim a siam țha ta vek nimai hian a lang, ka zîng tho ka chauh tehrêng nên, tûnah erawh ka zâng vah, ka mood a dik êm êm a, misual pawhin min kidnap dâwn se nui sângin keimahin an motor-ah ka lût ang tih vêl a ni.

Chutiang mood duhawm tak chu nei mah ila min phur mêktu Duhsaka erawh ka rin ang ngeiin a lungawi lo, kawng tluanin a phun ngat ngat a, kei lah chuan ngaihthlak pawh kalo ngaithla mang lo,

" Rawn kal rawh ka tih lai khan rawn kal ni la chuan ruah nasa tak ka do haw lo tur, kawng nâlah ka tlu leh nghal a, ka fapa ( a bike) râng nuai te hi min hmuhsak leh miah lovang chu, zânah min rawn biak zui ka ringa kalo ngaichang char char che a, chaw kan ei dawn i ti a, i reh zui hmak, message i reply bawk silo, mi hi chu i ngaihsak lo ve mah mah chu a ni , Hello, hello kapî min ngaithla em ? "

Kapî ' min ti chuan ka nuih a tiza tlata, a hnungah chuan ka chûm deuh dawt

" Aiah i va sual thei tak !, min chum hlum i tum a mi ? "

" I nghal lutuk, nizan kha chu ka nuamsam lova ka lo muhil daih a lawm, Coffee tui deuh ka treat ang che vawiin chu " ka ti sam êt

Coffee hi a thil ngainat te zînga mi a ni a, amah thlêm nân leh tlawn lungawi nân a chang chuan a hman ve mai theih, hman tlak miah loh châng, thinrim ngula min awmkhum châng erawh a nei.

Chawhmâ kan subject neih ang ang kan zawh hnu chuan Coffee in tûrin ka in phur chhuak a, Cafe chhûngah chuan lungkham nei lêm lovin dawhkan pakhatah inhma tawnin kan țhu a.

" Diary chu i chhiar ta em ? " tiin min zawt thut,

" Imm "

Thil dang ka sawi zui a beisei tih ka hria, ka phone chu ka hmet mawlh mawlh, min en reng, ka hmulo der tlat

" I phone kha nih theih ka châk "

Ka nui leh ta nge nge, ka phone chu ka dah a

" Mihring over ve tak chu i ni "

" A nih chuan enge inziak a, Diary ah chuan ? "

Duhsaka nên hian thla 2 zên zaŵn chu kan lo inkawp ve tawh, harsatna tam tak ka paltlang laia min fuihtu, hmalam pan tura ka nun kaihruai hrâm hrâmtu a ni a, a tîrah chuan țhian ang chauhin ka en a, kan innêl ve tawlh tawlha, inlaichînnah kan lût ve leh a. David-a nêna kan chungchâng engmah min zaŵt ngai lo turin ka ti a ni, tûn thleng hian vawikhat tê pawh min la zawt lo, zawhna tam tak , hriat chak tak tâk a nei daŵn lutuk. Paŵl sawmpahnih kha kan kal hova, khatih lai khân kan inhre țha em em lo, kei phei chuan ka râlkhat hriat a, ka nû damlohna leh David-a nêna kan inkâr buaina tamtak ka hmachhawn chhûng zawng khan, class ka kal țha ngai lova, amah hian zirlai pawimawh leh hriat tur țul tam tak inah min rawn pein, min rawn hrilh thlap thlap țhin.

Dik tak chuan Diary chungchâng chauh lo pawh hi engkim hriat a phu a ni, vawiin chu ka mood- a fuh bawk a eng emaw tal chu ka hrilh ve mai mai ang ka ti rilru a..

" Chawhhu chu class la lo mai ila ! " ka han ti dek dek a

" Immm tlângah khân kan kal leh dâwn a mi ? " a lo ti vat

Kan inhre chiang thawkhat fû, Cofffee kan inzawh chuan kan pahnih tê a kan kalna țhin Tlâng, hmun thengthaw nuam deuh lam pan chuan kan inzui chhuak leh a. Nidang-ah chuan inngaizawng midang an awm ve nual țhin, vawiin erawh tumah an awm lo, țhuthlêngah chuan kan țhu a, thli a thaw seng seng , Film vel-a romantic deuha an inchhâina hmun ang mai hi a ni.

" Thawnthu ka hrilh che nga i ngaithla duh a ngem ? " tiin ka zâwt phawt

A ni chu a lo bu nghauh

"Zawhna engmah min zawh chhunzawm lovang che, min tiam rawh "

Ka bianga rawn piai zeuh pahin " Ka tiam e " a ti a

" April ni 15 a ni a, Paŵl 12 ka zir țan Nî, school kan kal nî hmasa ber a ni, ka hlim êm êm a, ka phûr takzet. Ni hmasa ber a nih avângin lehkha pawh kan zir lêm lo, kan bâng hma viau leh nghal. Ka nau nên chuan in lam pana haw tumin TAXI kan châng a, David-a te țhian dûn chuan min lo pan ve mêk bawk,

David-a țhianpa Msa chuan, " Hi, Kimkimi i ni tiraw ? " a rawn ti a

" Imm "

David-a chu kei ai aiin a lo lâi emaw tih tûr a ni, a hawi sawn daih ,

" Self introduction neih lai khân i hming kalo chhinchiah a, Msa ka nia hei ka boss David-a ", kan inchibai a,

Zawhna a ngah phian, sawi tûr a hre ropui leh nghâl, engtin tin emaw Bazar-a leng ho turin kan inhmin ta ringawt , kan thil rêl te lah chu David-a chuan a lo hre ve rêng rêng lo.

David-a hnenah chuan, " Kal ila " tiin Ms-a chuan a han sawm

" Khawiah ? " a lo ti hu

" Min zui la i hre mai ang "

" Kan motor a lo thleng țep tawh asin " tiin a sana bun lai chu a han en zeuh

Ms-a lah chuan " In driver ka phone vek tawh kan rualin a lo haw dawn ka ti " a ti sam et a

" Tak tak ?"

" Aw tak tak e kal ang "

Ka nau leh kei chu an hmaah kan kal a, anni kan hnungah, ka lâi deuh lehnghal, a chhan chu mi tupawh kan hnunga an kal hian ka awm thiam lo.

" Ice cream ei ang u, in duh em ? " tiin Msa chuan min rawn zawt a,

ka nau Jeremy-a chu a lo " Yes " vat

Kawngsira ice cream an zawrh chu kan ei a, a tlawm viau nain, daŵr pangngaia to deuh deuha an zawrh aiin a tui daihin ka hria.

" Țawng ve la.. " ti a Ms-an David-a a hrilh ri su su chu ka hria a, hriat loh der a ngai bawk si

" Cinema kan en daŵn a mi in la hman em ? " Msa chuan a rawn ti leh a, haw tlang mai ka duh tawh laiin ka nau lah chu a phûr phûrah a lo la țang, ka kalpui leh ta ringawt.

Cinema chu kan en ho leh tê tê, fiamthu lam a nih avangin keimah pek chuan nuam ka tiin ka hlimpui leh ta phian, kan en zawh hnu te chuan kan sawi zui nak nak a, David-a tiam lovin, a ni chu a țawng ve pawh ka hre lo, kan bula awm chu nuam a ti vaklo a nih ka ring.

David-a chuan a taŵp a taŵpah, " Jeremy nuam i ti em ? " tiin ka rinloh deuh hian ka nau chu a lo bia a, mak ka va ti tak.

" Imm kal ziah ang u aw ? mahse ka ke a kham tawh " tiin ka nau chuan a chhâng a

" Khawi kalo pua ang che " tih leh a hnung dawh a rual

" Aaa, a ngai lo a kal thei a lawm " kalo ti vat

" Kha kan bag hi lo keng rawh " tiin Msa chu a pe a, Jeremy-a chu a paw lui ta tho, ka va inthlahrung tak, an inkaŵm ngeih phian leh nghal. Paŵna țhutnaah chuan kan țhu hova, ka nu hnenah kan kalna chin kan hrilh loh vângin awm rei viau chiin ka hre lova, ka nau duhlo chung ka haw luih pui, an ni pahnih erawh an la kal kual daŵn niin a lang.

Zanriah eikham chuan ka lehkhabu chhiar lai ngaihnawm deuh chu chhiar zawm ka tum a, ka phone a lo ri, number ringawt a nih avângin company vêl a nih ka ringa, ka hmet taŵp hmak, number ngai chiah chuan min rawn call leh, a pawimawh a nih ringin ka han la a,

" Hello "

tumahin min chhâng lo, " Hello " ka han ti nawn leh, tumahin min la chhâng chuang lo, hmeh tawp ka tum lai takin khuh, aw thian ri ka hria a, ka ngaithla vang vang, a la țawng mai lo,

" David-a ka nia, vawiina mi kha "

kei lah sawi mai tur hrelo chuan ka lo ngawi vang vang ringawt,

" Min la hria em ? " a ti leh

" E aw , a aa aw hria e,eng...tin nge ka number i neih a? "

ka țawng buh nuai

" I nau kha ka dila , pawi i ti êm lovang chu "

A inthlahrung lutuk chu ka khawngaih zawk " Aih teuhlo, aa ka sawi awmzia chu a pawilo ka tihna " tiin ka chhâng vat, " Tinge ka țawng dikloh vek " tiin ka phun sep, ka thin te chu a phu dep dep , ka phun ri kha a hria ang tih ka hlau leh hnuhnawh " Nilo nilo nilo " tiin tum laŵk loh deuhin ka hmet taŵp palh, ka thaw huai mai, ka lungphu rang lutuk te chu ka han dek vêl, ka phone chu ka en leh, min rawn call back tawhlo ang tih ka hlau ru viau si, keimah zawk chuan call pawp mai ka duh, enge ka phûr viau chhan hi ka hre lo, hepa hi ka duh tihna em ni ? "tiin keimah leh keimah chu ka inzawt . Ka phone a lo ri leh hlauh, amah ngei a ni,

" Hello "

" A tawp daih a i buai viau a mi ? "

" Aw aih, ka, ka signal a chiang vaklo a niang "

" A nih dawn chu, kalo call chhan chu I nau school bag kha Ms-an a ak haw daiha engtin nge niang, kan inah ka kawl a "

" E he ! kan lo hre tawh miah lo kan va â tak , ihhhh, naktûk saturday a ni thova zanin chu lehkha zir lo mai se, naktûk lamah a rem chuan kanlo lam mai ang in address lo sawi la "

" Keimahnin kan lo dah ang "

" Aih a ngai lo.. in buai phah lutuk ang "

"Buai phah lovang bâkah kan lo lêng châk hrim hrima, zêp lo chuan in kal daŵn pawh khân ka hre reng ka hrilh duhlo a lawm, in ina lo lenna chance ka tia "

A va nghal tak, ka nui ringawt,

"I thinrim lovang tiraw? "

" Thinrim love , a ho lutuk "

A țawngkam a puitlingin , a polite em em a, a mizia chauh nilo a aw ringawt pawh hian min hneh nghâl ni berin ka hria, mahse hmeichhia zâwk ka ni a, duh huam huam anga ka awmloh a ngai.

" Hello" a rawn ti leh, ka lo ngawi leh vûng vûng tawh chu lo niin

" Aw hello "

" Vawiin kha in chau viau lo maw ? "

" Chau love nuam kan ti lutuk, ka nau phei chuan zanriah ei lai te khân nuam a tih thu a la sawi char char, kan lawm lutuk "

" A... lawmthu min hrilh suh keimahni zâwkin nuam kan tia, ka țawng vak silova minlo ngei viau lo maw ?"

" Teuhlo mai "

" Mi ka vawikhat hmuh naah hian sawi tûr ka hrelo thei lutuk a " a nui zeuh tih a aw ațang chuan ka hria, a nui hmêl duhawm tak, nasa si lova a kiai deuh suk kha pâ ka ti a, ka mithhlah a lang nghâl

" Keipawh ka nia lawm " ka ti vat a

"I ni ve tho maw ? Mahse kei ai te chuan i țawng tam daih zawk ang "

" I unaupa nge i țhianpa Msa kha, amah kha a awma ka țawng tam mai mai a nih kha, ka zakzum lutuk "

" Ka thianpa a nih kha, mahse, ka unaupa ang a ni mai, unau dang kan neilo ve ve a, kan naupan lai ațang tawhin kan inkawm tawh, ka pa leh a pa hi an naupan lai ațanga inkawmngeih ve tho an nia, anmahni nên chuan chhungkua ang kan ni mai, kan in closed lutuk "

" A nih daŵn chu, a nuam ngawt ang, in hmêl te pawh a inang țêp alawm ? " daŵt kan sawi ringawt

" Ka tibuai lutuk palh ang che, a nih, naktûk chu kanlo lêng dawn a ni aw, i phal chuan ? "

" E awle kan address ka lo sawi dawn a mi ? "

" A ngai lo ang i nauvin min hrilh tawh "

Ka hriat loh hlânin engkim an lo ruahman fel vek chu niin, an va sual tak

A tûk zîngah chuan hma deuhah ka thova, David-an an lo lên daŵn thu min hrilh avâng khân nidanga inchhung ka tihfai țhin aia uluk zaŵkin ka tifai a, rei lotê-ah engkim peihfel a ni ta.

ka nu chu zingkârah daŵr nghak tûrin a chhuak daih tawh a, inrinni hi chuan ka nghah chhaŵk ve țhin , vawiin erawh ka țhiante an lo kal dawn tih a hriat avangin min phût lemlo, daŵr bungrua a rawn thleng thar tho daŵn bawk nên.

Secondhand daŵr lian vaklo a hmingin kan nei ve a, kan chhûngkaw ei hmuhna ve ber a ni. Ka pa hian Cancer natna vangin kum 12 lek ka nih lai khân min boralsan a, ka nu pawh hi a hriselna a pan hle, harsa taka eizawngin tiang hian tûn thlengin minla hmeithaipui a, ka nu hi khawvela ka hmeichhe ngaihsân ber, ka entawn ber a ni .

Door bell a lo ri ta, hmanhmawh deuhin kawngkhvr lam ka pan nghal, kei ai aiin ka nau chu a lo phûr, kawngka te min lo hawn khalh .

Khami ni kha David-a nêna inngaizawng anga kan awm țanna ni a ni a,

" A bem che tihna a mi " Duhsaka chuan a lo ti vat

" Imm "

" Chuan, Yes' tiin i chhang ta a, a nih in in kiss em ? "

Ka nui ringawt, a chhânna chu a hrethiam mai, " Duhtaŵk phawt rawh, zanianh a full story min hrilh ang, assignment ti turin in inah ka lo kal a ngaih kha "

" Duh lo ta ila "

Ka hmuiah min rawn kiss thut, Titanic film chang ve ta ang mai hian ka inhria.