NGÂIDAM RAWH ! || CHAPTER - 1

                                                                   CHAPTER - 1

Engvanga he khawvêl hmeichhe zinga vanduai bik em em nge maw ka nih bik ? Pângngai taka zân ka mut lohna chen pawh ka hre tawh lo, khua a lo vâr a nga, ni thar duhawm tak ka tân a inher chhuak ve tawh ang ' tiin vawi tam tak ka ngaihtuah țhin, vawiin ni thleng hian ka beisei ang ni thar duhawm chu a lo la thleng thei silo. Engpawh ni se ka beidawng thiang lova, ka hmangaih ber thihna vanga khawvêlin thiamloh min chantirna pawh hi engtik niah emaw chuan hailan a la ni ang a, miten min dem reng tawh bik lo vang ' tiin ka rilruin ka infuih sauh sauh a.

Ka kal tumna hmun chu reiloteah kan lo thleng dêr mai, khua lah chu a duai hlê a, ruah thimpui sûr tûr ang mai hian thli a thaw vûk vûk, David-a te in ka thlen chuan a hma anga awlsam taka Door bell han hmeh mai ka tuma, ka thauah' hian eng emawni tak hian min man, thaŵk ka han la deuh kawk, Door bell hmeh leh ka tum lai tak chuan " I lo leng dawn elaw ? " tiin David-a pain ka hnung lam ațangin minlo bia a, ka phu zawk, min ti ham haih vek leh nghal.

Ka chhân lêt hma hma chuan " Kaw rawh , ilo lêng khât hle mai " a ti a, kan inzui lûta, 

" Vid-a nu hei Kimi a lo lêng ve tlat mai paŵnah kan rawn intawk a nih hi "

" Min rawn tlawh tura ka hrilhna kâr hnih chuang a liam tawh ! " a lo ti bul hmuk 

David-a pa chuan " A buai ve a niang zirlai te an nia, bâkah Bawiha boralna pawh a la rei silova atân a sûlhnu rawn chhui fo te pawh a la hrehawm viau mai thei asin, thingpui tui deuh in ila , Kimi țhu ta che khatia i din reng a i ke te a kham a nga sin "

Țhutna awlah chuan hamhaih deuhin ka țhu a, sawi tur mai pawh ka hrelo,

" Sangpui, i u Vid-a room chabi min rawn pe rawh " tiin David-a nu chuan an nula eirawngbawl chu a au va, min laŵm vaklo a ni tih a hmelah a lang, hei vâng hi a nia he hmun tlawh leh pawh ka hreh êm êm, mahse, ka kal vat loh chuan ka huphurh tawlh tawlh daŵn si a.

Chabi a rawn pêk hnu chuan inchungah chuan kan inzui chhova, David-a room kan lût chiah chu ka biangah mittui a far nghal ta zung zung, a damlaia a awm ang chiah khan, lehkhabu, thuamhnaw engkim mai chu felfai takin a lo la inrem fel thlap a, a khum bula kan pahnih thlalak a târ pawh a lo la awm vâng mai, ka birthday hnuhnung bera mi kha a ni leh nghal.

Ka suangtuahna chu a lo vâk thui hman hlê a, he room chhûnga nun beidawng taka zantin a inngaihtuah dân tûr te, hre reng chunga a call ka pick-up  duh loh laia, a hrehawm ti lutuk tûr hmêl te chu ka ngaihtuahnain ka hmu thleng pha ve vek a ni, ka inthiamlo hnu hnawh takzet .

" Kha hei hi la rawh" tiin a nu chuan a diary chu min pe a, " Ka lawm e " ka ti sep a, 

" Ka hriat ve tur thil te a awm a nih chuan min hrilh daŵn nia "

" Tehreng mai "

"Inhnuaiah thil tih laklawh lai ka neia kalo zuk chhuk a nge, i duh hunah i rawn chhuk ve mai dawn nia " tiin min chhuahsan a

Khumah chuan ka țhu a, Diary chu David-a angah ngaiin ka han kuah vawng vawnga, tukverh ațang chuan paŵnlam khawdur, ruah sûr mai tûr ințham vêl, thli thaw vûk vûkin thingkûng a a chhêm chêt te chu a hmuh theih a, chûng te chuan ka lung an tileng zual, a hma kha chuan he room-ah hian kan țhian za hovin kan nui dar dar țhin, kan hlim em em thin kha a ni si a, nimina thil thleng ang maiin mitthlaah an la châm veng veng mai, ka mittui tla chu thuhran nise, ring taka țah hawm hawm ka châk a ni, amah kha awm phei se chu nghet taka kuaha , țah khum hial ka nâp.

Ka phone a lo ri a,

" Hello "

" I hman tawh em ? paŵnah ka nghak che a nia "

"Imm minute 5 hnuah ka lo kal ang"

Tukverh ațang chuan ka han thlêk zuai, paŵnah chuan Duhsak-a chuan minlo nghâk rân tawh, a rawn thlen hmaa in chu lo chhuahsan a, amah nghâktu zawk nih ka tum tehlul nên, David-a nu leh pate nên an inhmuh chu ka thil hlauh pakhat a ni sa hrim hrim bawk, ka mittui chu ka han hru sawk sawka, darthlalangah chuan ka sam te pawh ka siam rem nawk nawk, room chu chhuahsan mai ka tuma, kawngkhar chu ka hawng thei mai silo, paŵn lam ațangin min kalhkhum palh a nih ka ring, hawn chu ka han tum lui leh hrâm tho, a sak em em mai si, keia hawn theih rual a nilo, light a rawn thim zui, kaŵl phe ruala țêk rawn tla thut chuan min va tiphu chiang tak , David-a nu chu call ka tum lai takin kawngkhar min rawn hawn hlauh.

" Nu Puite ka kal nghal mai ang ka țhianpain pawnah min nghâk tawh a "

" Aw ! thingpuite pawh kan siam kêp vek che asin in zuai zuai rawh , i țhianpa pawh chu ko lut lawk mai la "

An hmuh mah hlauh nâk alaiin ko lût turin min han ti leh hrâm a,

" Ni e Kimi i rawn kal khât leh tawh âwm si a, thingpui tal chu i in a ngai, i țhianpa pawh chu ko lut la thingpui te pawh rawn in ve rawh se " David-a pa chuan a la ti deuh deuh, ka hnial ngam bawk silo, Duhsaka chuan minlo call veleh chiah.

Rawn lût ve tura ka tih chuan min hnial fithla țhak, thingpui chu kan han ina, chu in chu chhuahsan vat duhnain min tur tawh, zawhna chhân harsa tak min zaŵt ang tih ka hlau a ni.

 " I bialpa a mi ? " David-a nu chuan a rawn ti leh khauh, ka mitah tak min en leh nghâl

" Aih nilo, ka , ka țhianpa a nia kan College a mi " amah pawh ka en ngam tawhlo, Duhsaka lah chuan paŵn ațangin a Bike horn a rawn hmet ri tuar tuar tawh, dawhtheihna leh nghah theihna a neih loh zia hre chiang bertu ka ni a, a lo thinrim hlur tawh daŵn tih chu chiang sa a ni. Thingpui chu ka tlâk pawpa, " Ka kal mai ang ruahin min nan ang tih ka hlau deuha, ka hman veleh ka rawn kal leh dawn nia " tiin ka hrilh a, an nupa chuan pawn thleng min thlah, David-a nu hi chu ka sawi thiam dân chuan mi ni deuh fawk fawk chi a nih avângin ka ngaina ngai lo hrim hrim, a pa erawh mi biang biak leh chhawnchhaih vêl a thiam êm êm a, leh a mizia hrim hrim hi ka ngainat chi a nih avângin ka nêl hlê thung.

Kan ina Duhsakan min thlah hnu lawk chuan ruah lah chu a mak a maka tamin a rawn sûra, kawng laka a chawl te a nih ngawt loh chuan a huh zawr vek ngei ang, a va thinrim leh daŵn em ?

Zanriah ei khamah chuan kan chaw eina te tifelin thlêng te chu ka sil sawk sawka, ka rilru-ah Diary ringawt kha a awm tawh. Ka intihfel meuh chuan zân dâr 8 lai a lo ri tawh a, khum-ah chuan awmhmun han siam rem tê têin, a phêk tawpna ber chu ka keu nghâl chat, tihian a lo inziak a,

" KIMKIM, ka diary hi ka nu hnênah lo pe chhaŵng tûr chein ka ti a, ilo chhiar ngei ka beisei, min hua tih ka hria, kei chuan ka hmangaih che a, ka hmangaih reng ang che. He Diary i chhiar zawh hunah phei chuan min huatna a zual hlê maithei a, mahse, hringnun hi dai sual palh theih a nih vângin, khawngaih takin minlo ngaidam dâwn nia.

Daŵt tam tak ka hrilh che a, pawi ka ti takzet, min kalsan ka hlauh êm vâng a ni. Hmangaihna hi ka lo hrethiam velo pawh a ni maithei , ngaihzawng ka vawikhat neihna a ni tih i hriat kha, ka thinlung zawng zawngin ka hmangaih che,ka tâna ' hmangaih hmasa ber leh hnuhnung ber ' i ni thei hi ka inchhuang takzet,

Hlim taka i awm hi ka duh bera, chuvâng chuan he thil hi ka tih a ngai ta si, ka hmangaih takzet che tih i lo hre reng dâwn nia....."

 NEXT CHAPTER : CHAPTER - 2